ګوزنیشافغانستان له برازیل څخه په درنې ماتې سره دویم مقام خپل کړ
د افغانستان د فوټسال ملي لوبډلې د برازیل په شپږ اړخیزو سیالیو کې د کوربه او د نړۍ د لومړۍ درجې لوبډلې پر وړاندې په ماتې سره دویم مقام خپل کړ.
دا لوبه نن شپه د کابل پر وخت په ۸:۳۰ بجو پیل شوه او څو شېبې وړاندې د برازیل پر وړاندې د افغانستان په شپږ پر صفر ماتې پای ته ورسېده.
د برازیل لوبغاړو په لومړۍ نیمايي کې یو او په دویمه نیمايي کې پنځه ګولونه د افغانستان په دروازه کې ووهل.
د افغانستان د فوټسال ملي لوبډلې ګولساتونکي محمدجواد صفري په دې لوبه کې د برازیل د لوبغاړو یوه پنالټي مهار کړه او د ګول مخه یې ونیوله.
د دې لوبې په دویمه نیمايي کې عباس حیدري د برازیل پر لوبغاړي د خطا له امله او سید مرتضی حسینې د دوو ژېړو کارتونو د اخیستو له امله سره کارتونه واخیستل او له لوبې وایستل شول.
د افغانستان د فوټسال ملي لوبغاړي په نیمه پایلوبه کې کیپورد ته د څلور پر دوه ماتې په ورکولو سره پایلوبې ته رسېدلي وو.
د افغانستان د فوټسال ملي لوبډلې په ګروپي پړاو کې له جاپان سره لوبه هم له ګول پرته مساوي کړې وه او پیرو ته یې درې پر صفر ماتې ورکړې وه.
