ټرمپ د اسرائیل په راتلونکو ټاکنو کې د نتنیاهو ملاتړ اعلان کړ

ټرمپ نن شپه (یکشنبه، د تلې ۲۶مه) په ټروت سوشل کې په یوه خپاره کړي پوسټ کې نتنیاهو «یو جنګیالی او ستر لومړی وزیر» بللی او ویلي یې دي چې هغه د ایران د اسلامي جمهوریت پر وړاندې په مبارزه کې «یو ستر شریک» و.

ټرمپ زیاته کړې چې نتنیاهو یې په تر ټولو سختو وختونو کې څارلی او هغه نه یوازې له پښو نه دی لوېدلی، بلکې لا پیاوړی شوی هم دی؛ «او دا هماغه ډول شریک دی چې امریکا یې له اسرائیل څخه تمه لري؛ هغه هېواد چې امریکا ورته ډېر زیات کارونه کړي دي».

د امریکا ولسمشر له ایران سره جګړې ته هم اشاره کړې او ویلي یې دي چې «دا هېواد په سیستماتیک ډول هم له پوځي او هم له مالي پلوه ویجاړ شوی دی او که ژر خپله تګلاره بدله نه کړي، ډېر ژر به یې کار پای ته ورسوو».

خو ټرمپ خبرداری ورکړی چې که د اسرائیل خلک ناسم مشر، یعنې له نتنیاهو پرته بل څوک وټاکي، نو هغه به په یوازې ځان د ایران کار پای ته ورسوي، که څه هم دې کار ته لېوالتیا نه لري.

ډونالډ ټرمپ ویلي چې نتنیاهو ان د اسرائیل په دننه کې د مخالفتونو پر وړاندې هم مقاومت کړی او د اسرائیل خلکو ته یې په خطاب کې ویلي دي: «هغه به هېڅکله تاسو ناهیلي نه کړي.»

ټاکل شوې چې د اسرائیل پارلماني ټاکنې د روانې میلادي میاشتې په ۲۷مه ترسره شي. ډونالډ ټرمپ په داسې حال کې د نتنیاهو ملاتړ اعلان کړی چې د وروستیو نظرپوښتنو له مخې، د نتنیاهو په مشرۍ «لیکود» ګوند د اسرائیل د پوځ د لوی درستیز د پخواني مشر ګادي ایزنکوټ په مشرۍ له «یشار» ګوند څخه وروسته دی.