ګوزنیشمکرون: هېڅ شی تاوتریخوالی نه شي توجیه کولای
د فرانسې ولسمشر امانویل مکرون، یوه ورځ وروسته له هغې چې دغه هېواد په وروستیو کلونو کې د عامه ناکراریو له تر ټولو سختو ورځو یوه تجربه کړه، په ټوله فرانسه کې د ارامۍ غوښتنه کړې ده.
رویټرز د دوشنبې په سهار وختي، د اکتوبر په ۱۹مه، راپور ورکړی چې مکرون د لاریونونو له پراخېدو وروسته په یوه ټلوېزیوني وینا کې دا غوښتنه کړې ده.
د راپور له مخې، مکرون ویلي چې سولهییز لاریونوال پر حقه غوښتنې لري او د هغوی کړنې باید د هغو کسانو له کړنو سره یو شان ونه ګڼل شي چې د ګډوډۍ او ورانۍ د رامنځته کولو په لټه کې دي.
مکرون ویلي: «د دغو انځورونو په لیدو موږ ټولو له ځانه پوښتلي: د هغوی په ذهنونو کې څه تېرېدل؟ فرانسویان څنګه کولای شي له فرانسې سره داسې کار وکړي؟»
نوموړي د ځینو ښياړو سیاستوالو له غوښتنې سره سره، د بېړني حالت له اعلانولو ډډه کړې؛ خو ویلي یې دي چې حکومت به داسې تدابیر ونیسي چې سیمهییزو چارواکو ته اجازه ورکړي، د اړتیا په صورت کې د عامه ودانیو او سیمهییزو کاروبارونو د ساتنې لپاره د غونډو پر جوړولو بندیز ولګوي.
خو په دغه هېواد کې سراسري لاریونونه په بلوا واوښتل؛ په بېلابېلو ښارونو کې تاوتریخجنو ډلو له پولیسو سره نښتې وکړې، د ښاروالۍ یوې ودانۍ ته اور واچول شو، هټۍ لوټ شوې او پر ودانیو شعارونه ولیکل شول.
